السعيدي :

ياسلام الله عليكم وش نبيع ونشتري به

يامداغيش الرجال اللي تعرفون الرجال

سولفوا يأهل المعرفه كل رجال ونصيبه

ودي أفهم مكسبي ياربعنا من راس مالي

أبن شنار :

مرحبا يا الشاعر اللي لك طواريق غريبه

طاب كيفي يالسعيدي يوم حل بك المجالي

ياالسعيدي بس بعض الناس حنا وش نبي به

مايعرف الوزن والمكيال ولا يرقى الجبالي

السعيدي :

انت وصف الجدي في وقت المساري نقتدي به

لي مشينا في الدبادب فوق موميه الحبالي

ماعلينا من مطير ولا علينا من عتيبه

لقني بالك ولقي صاحبي يالربع بالي

أبن شنار:

آه ياقـلبا شكي يا سعود من فرقا حبيبه

عيني القشرا تشكي من جنوب ومن شمالي

الصقر لي جوّد الصيده مخاليبه عطيبه

فتح بعينك قدم عيني وحذرا لا تلالي

السعيدي :

انت تشكي من مصيبه اما انا كم من مصيبه

لاتنقظ لك جروح مرمسات من الليالي

ليه ماخليت بالك يوم تخطي مالضريبة

يوم تخطي مالحباري كيف خليت الغزالي

أبن شنار :

لاتزاعم لك زعيم كل طاروق يجيبه

الجمل ذيك السنه حطيت في رجله عقالي

والله انا مانبيها فوق صاحبنا غليبه

الحباري صبتها يا سعود وباقيها توالي

السعيدي :

المزاعم عادةٍ لي وباخذ  الفاتن غصيبه

ما دريت إني إلى جاء الصدق ابو زيد الهلالي

لو أبي حفرت لك قبرٍ ومن فوقه نصيبه

خايف أيتم عيالك والمحاسب في العمالي

أبن شنار :

يالسعيدي لك عيون ذا السنه مني رعيبه

وان نزرتك خفت مني وانت عم لي وخالي

لا تزاعمني ترى دنياك يالصاحب قريبه

تحسب اني مثل ذاك اللي عليه السيل سالي

السعيدي :

انت ذيب التلعه اللي ما يشرف في الجذيبه

انت ياذيب الغنم حذراك من ذيب الجمالي

لو ابي شقيت ثوبه ماسفله من حد جيبه

خايفٍٍ يقال موسك عظ في الخصم الموالي

إبن شنار :

يالسعيدي لا تعلا بالشواهيق الصعيـبة

غظ عينك خلك أسفل من الطمان الى الظلالي

سيفي اللي ليسطا شق الثنادي والتريبه

وانت غرهد يم فالك اما انا بامشي في فالي

السعيدي :

قد رقينا في طويق وقد نزلنا في شعيبه

ما نحسب باول العربان ولا حسب التوالي

السعيدي لو يصيبك يتعب جروحك طبيبه

مير خله ما طرالك يارفيقي ما طرالي

أبن شنار :

يا السعيدي هات ما عندك لنا وش تحتري به

بس قدامك زعيم في الشجاعة ما يبالي

خابرك شاعر كبير بس قدامك لعيبه

والارانب بتخومر في الدحول وفي الرمالي